Bioloogisesta perspektiivistä näyttää siltä ette miehet oon fyysisesti väkkeevämmät ja aggressiivisemmat ko vaimot. Siksi se oon ushein luonolista ette mies jolla oon pitkät käđet kanttaa painaaviimat loovat.

Tutkimukset näyttäävät ette vanhemat miehet ottaavat mielelä nuoremppii vaimoi ko valitteevat partnerin.

Evolusuuniteoriin jälkhiin, se oon tärkkeetä miehile levittäät ittensä geenit ja saađa lapsii niin ette heiđän geenit elläävät etheenkäsin. Se oon mahđolinen ette miehet saavat lapsii vielä vanhaanaki, ja siksi het saattaavat tuntteet vettoo nuorempii vaimoi kohthaan ko het oon vielä hetelmällisessä ijässä. Näin saattaavat miehet lisätä mahđolisuuksii saađa tervheitä ja vahvoi lapsii jokka vievät heiđän geenit etheenkäsin.

Joissaki tutkimuksissa oon kattottu sitä kuinka poikkii ja tyttärii kassuutethaan ja opetethaan käyttämhään ittensä eri laihiin.

Tutkimuksissa oon saatu selvile ette samfynnissä oon erilaiset ođotukset siitä mihin assiissiin pojat ja tyttäret oon interesseeranheet, mistä färiistä het tykkäävät, mitä ammattiita het valitteevat ja kuinka het käyttäävät ittensä. Tämä tarkoittaa sitä ette met opetamma lapsile ette vissit assiit oon tyypiliset pojile ja toiset taas tyypiliset tyttärille.

Juuri tämmöiset ođotukset jokka meilä oon lapsile, oon myötä haamustamassa lasten identiteettii.

Se oon tärkkeetä panna merkile ette kaikki pojat ja tyttäret ei vastaa näihin ođotukshiin, eikä se ole ollenkhaan väärin. Met kaikin olema erilaiset ja se oon tärkkeetä kunnioittaat ja hyväksyyt toinen toisen interessiitä, färrii, ammattiita ja olemisen tappaa riippumatta siitä mitä samfynni sannoo. Met saatama valita sen mistä met tykkäämä ja kukka met halluuma olla sukupuolesta henkkaamatta.

Samfynnin sukupuolirolliile ja sukupuolieroile saattaa olla usheita selityksii, mutta vieläki tingathaan siitä tulleevatko rollit bioloogisista vai sosiaalisista syistä.

Mitä sie meinaat?